مسلم لیگ (ن) اور پیپلز پارٹی کا ضمنی انتخابات مل کر لڑنے کا اعلان

 

(ایوب اسپیک – اسلام آباد)

پاکستان مسلم لیگ (ن) اور پاکستان پیپلز پارٹی نے ضمنی انتخابات مل کر لڑنے کا فیصلہ کر لیا ہے۔ دونوں جماعتوں کے رہنماؤں نے مشترکہ پریس کانفرنس میں اعلان کیا کہ ایک دوسرے کے خلاف امیدوار کھڑے نہیں کیا جائے گا اور جس حلقے میں جس جماعت کا امیدوار عام انتخابات میں دوسرے نمبر پر آیا تھا، وہاں دوسری جماعت اس کی حمایت کرے گی۔

پیپلز پارٹی کے رہنما اور سابق وزیراعظم راجا پرویز اشرف نے کہا کہ یہ فیصلہ دونوں جماعتوں کے قائدین کی ہدایت پر کیا گیا ہے۔ ان کا مزید کہنا تھا کہ دونوں جماعتوں کے درمیان فارمولہ طے پا گیا ہے، جس کے تحت پیپلز پارٹی ان حلقوں میں مسلم لیگ (ن) کی حمایت کرے گی جہاں ن لیگ کا امیدوار دوسرے نمبر پر تھا، عام انتخابات میں اور ن لیگ وہاں پیپلز پارٹی کو سپورٹ کرے گی جہاں پی پی پی کا امیدوار دوسرے نمبر پر آیا تھا۔

وفاقی وزیر اور مسلم لیگ (ن) کے رہنما حنیف عباسی کا کہنا تھا کہ دونوں جماعتیں پہلے ہی سینیٹ، قومی اور صوبائی اسمبلی میں اتحادی ہیں اور اب ضمنی انتخابات میں بھی مشترکہ حکمت عملی اختیار کریں گی۔ انہوں نے کہا کہ ہم مل کر انتخابات میں کامیابی حاصل کریں گے۔

یہ فیصلہ سیاسی طور پر پی پی پی اور ن لیگ کے حکومتی اتحاد کو مزید مضبوط بنانے اور ووٹ تقسیم ہونے سے روکنے کے لیے کیا گیا ہے۔

 

یہ اتحاد اس بات کی علامت ہے کہ حکومتی اتحاد ضمنی انتخابات میں اپنی پوزیشن مضبوط کرنا چاہتا ہے۔ دونوں جماعتوں کو احساس ہے کہ مخالف امیدواروں کو روکنے کے لیے ووٹ تقسیم نہیں ہونا چاہیے۔ یہ حکمت عملی قلیل مدتی فائدہ دے سکتی ہے، لیکن طویل مدتی سیاست میں دونوں جماعتوں کے اپنے مفادات ٹکرا سکتے ہیں۔

بظاہر یہ اتحاد وقتی طور پر فائدہ مند ہو سکتا ہے، مگر مستقبل میں سیاسی چیلنجز پیدا کر سکتا ہے۔ اگر یہ فارمولا کامیاب ہوا تو ن لیگ اور پی پی پی کے درمیان آئندہ انتخابات میں بھی سیٹ ایڈجسٹمنٹ کے امکانات بڑھ سکتے ہیں۔ تاہم، اصل امتحان میدان میں ہوگا کہ ووٹرز اس اتحاد کو کس نظر سے دیکھتے ہیں۔ کیا یہ فیصلہ دونوں جماعتوں کے لیے کامیابی لائے گا یا نہیں؟ اس کا فیصلہ وقت کرے گا